وجبة كنتاكى كامله فى البيت

لو نفسك فى وجبة كنتاكى

فراخ مقلية
وبطاطس محمرة
وكول سلو
ورز ريزوتو
تعملى ايه

بسيطة روحى كنتاكى

لا بجد انا هعمل انهارده ليكوا الكنتاكى بكل لوازمه بشكل صحى لانى مش باحب كلمة ريجيم ودايت والكلام ده

اول حاجة الفراخ

المقادير

فراخ زى ما انتى عاوزة مخلية او بالعضم عادى
بقسماط ماى واى بتاع الفراخ البانيه
مستردة
فلفل
بابريكا
خل
بيضة
زبادى

الطريقة
1-تقطعى الفراخ بالطريقة اللى انتى عاوزاها لو بالعضم الفرخة تتعمل كل ربع اتنين والجناحين ولو مخلية حسب رغبتك انا عملتها قطع صغيرة

2-تتبليها بكل التوابل على بعض ومعاهم البيضة كمان ولو تحبى تحطى بصل كمان على الخلطة بس
مفروم
3-تنقعيها فى الخلطة على الاقل ساعتين

4-وبعدين فى البقسماط بتاع ماى واى لازم لان البقسماط العادى مش بيطلع حلو وخلى بالك وانتى

بتتبلى البقسماط فيه توابل وملح

يعنى قللى التوابل والملح علشان الطعم يطلع مزبوط باذن الله

5- وادهنى صينية زيت خفيف خالص ورصى الفراخ فيهاالاول متغطية وبعد تلت ساعة شيلى الغطا

6-ورجعيها الفرن تانى لحد ما تتحمر وعلى فكرة الوقت بتقدريه انتى حسب التقطيعة بتاعت الفراخ

7-والاخر لو لقيتى حتت ناشفة بخى عليها زيت خفيف وبكده تبقى جاهزة وده شكلها بعد ما تخرج م الفرن

نيجى للبطاطس

المقادير
بطاطس
ملح
خل
توابل حسب الرغبة

1-تقشرى البطاطس وتغسليها وتقطعيها صوابع وتسلقيها نص سلقة فى مية وخل وملح وبعدين

2-تشيليها تبرديها بمية وتحطيها فى صينية وتوابل زى ما يعجبك انا حطيت فلفل اسود وبابريكا وبهار وعلى الفرن لغاية ما تستوى وتبقى كده

الارز

المقادير
ارز عادى او بسمتى
معلقة زيت
باقى تتبيلة الفراخ
ملح

الطريقه
اوعى تكونوا رميتوا باقى تتبيلة الفراخ يا قمرات

1-حطيها على الرز اللى تكونى ناقعاه قبلها بليلة علشان يتخلص من اكبر كمية من النشا
2- وبعدين يتغسل ونضيف عليه التتبيلة وكمية ملح حسب الرز ومعلقة الزيت والمية لو رز مصرى بعد النقع المية يادوب تغطيه علشان هو خلاص شرب مية من النقع وتسويه عادى

الكول سلو

المقادير

الكرنب الكابوتشى
جزر
خيار
بصلة
زبادى
معلقة مايونيز

1-ابشرى كل المكونات وهاتى الزبادى واخلطيها بمعلقة المايونيز هتبقى كلها طعم المايونيز بالظبط واخلطيها بالخضار ولو احتاجت ملح براحتك وده شكلها

وده الطبق النهائى ايه رايكم

او ممكن يتقدم كده من غير رز

وصفة رااائعة وباين عليها لذيذة

وشكلها بجنن شكرا على تنزيل الوصفة

اختى الغاليه ام ادريس سويها راح تعجبك وتعجب الاولاد

» تخيل لو دخلت البيت...........
» دراسة: تجاهل وجبة الإفطار يرفع فرص الإصابة بالسمنة والمشاكل الصحية
» سورة البقره كامله